കൊടകര: കനകമല കുരിശുമുടി നോമ്പുകാല തീര്ഥാടനത്തിനെത്തുന്ന വിശ്വാസികള്ക്ക് ദിവസവും നേര്ച്ചക്കഞ്ഞി ഒരുക്കി നല്കുകയാണ് ഇടവകയിലെ വിവിധ ഭക്തസംഘടനകളുടേയും കുടുംബയൂണിറ്റുകളുടേയും കൂട്ടായ്മ. കനകമല തീര്ഥാടനം തുടങ്ങിയ ഫെബ്രുവരി 15 മുതല് ഈസ്റ്റര്ദിനം വരെ അമ്പതുദിവസങ്ങളിലും മുടങ്ങാതെ നേര്ച്ചക്കഞ്ഞിവിതരണം നടത്തുന്നതിനുള്ള വിപുലമായ സംവിധാനമാണ് തീര്ഥാടനകേന്ദ്രത്തില് ഒരുക്കിയിട്ടുള്ളത്.
മലകയറി കുരിശുമുടിയിലെത്തി വിശുദ്ധനെ വണങ്ങിയശേഷം ഇറങ്ങിവരുന്ന മുഴുവന് തീര്ഥാടകര്ക്കും അടിവാരം പള്ളിയുടെ അങ്കണത്തില് നേര്ച്ച ക്കഞ്ഞിയും ചമ്മന്തിയും ഒരുക്കിനല്കുന്നുണ്ട്. ഇടവകയിലെ വിവിധ ഭക്തസംഘടനകളിലെ പ്രവര്ത്തകരും പതിനഞ്ചോളം വരുന്ന കുടുംബകൂട്ടായ്മകളിലെ അംഗങ്ങളും ഊഴമനുസരിച്ചാണ് നേര്ച്ചകഞ്ഞി തയാറാക്കി നല്കുന്നത്.
സര്ക്കാര് നിര്ദേശിച്ചിട്ടുള്ള മാനദണ്ഡങ്ങള് പാലിച്ചുകൊണ്ടാണ് പാചകപുരയില് ഇവര് സേവനം ചെയ്യുന്നത്. ഇടവകാംഗങ്ങളുടെ ഒരുമയോടുകൂടിയ ചിട്ടയായ പ്രവര്ത്തനമാണ് മുടങ്ങാതെ നേര്ച്ചകഞ്ഞിവിതരണം ചെയ്യാന് കഴിയുന്നതിനു പിന്നിലുള്ളതെന്ന് തീര്ഥാടന കേന്ദ്രം റെക്ടര് ഫാ. ഡെയ്സണ് കവലക്കാട്ട് പറഞ്ഞു.
പാചകം ചെയ്യുന്നവര് ആവശ്യമായ ഹെല്ത്ത് കാര്ഡുകള് തീര്ഥാടനം ആരംഭിക്കുന്നതിനു മുമ്പുതന്നെ അധികൃതരില് നിന്ന് കൈപ്പറ്റിയിരുന്നു. സാധാരണദിവസങ്ങളില് ശരാശരി ആയിരത്തോളം പേരും വെള്ളി, ശനി, ഞായര് ദിവസങ്ങളില് അയ്യായിരത്തിലേറെ പേരും കുരിശുമുടി കയറാനായി കനകമലയിലെത്തുന്നുണ്ട്. വൈകീട്ട് ഏഴുമണി മുതല് പത്തുമണിവരെയാണ് നേര്ച്ചക്കഞ്ഞി വിതരണം.
വെള്ളി, ശനി, ഞായര് ദിവസങ്ങളില് രാത്രി പതിനൊന്നുവരേയും നേര്ച്ചക്കഞ്ഞി നല്കി വരുന്നുണ്ട്. ജനറല് കണ്വീനര് വര്ഗീസ് കള്ളിയത്ത്പറമ്പില് , ഫുഡ് കമ്മിറ്റി കണ്വീനര് സൈമണ് കറുകുറ്റിക്കാരന്, പിആര്ഒ ഷോജന് ഡി. വിതയത്തില്, കൈക്കാരന്മാരായ ജോസ് വെട്ടുമണിക്കല്, ജോസ് കറുകുറ്റിക്കാരന്, പൗലോസ് ഗോപുരം, ജോജു ചുള്ളി എന്നിവരാണ് നേര്ച്ചക്കഞ്ഞിവിതരണത്തിന് നേതൃത്വം നല്കുന്നത്.
Deepika
E-paper LOGIN
LOGIN
